بلوچستان میں شدید بارشوں اور سیلاب نے تباہی مچا دی

کوئٹہ: بلوچستان کے ضلع بولان میں شدید بارشوں اور سیلاب نے تباہی مچادی، مختلف حادثات میں اب تک 5 افراد جاں بحق ہوچکے ہیں جبکہ متعدد علاقوں میں گیس سپلائی معطل ہوچکی ہے۔

تفصیلات کے مطابق ضلع بولان میں سیلاب سے تباہ کاریاں جاری ہیں، لیویز ذرائع کا کہنا ہے کہ ڈھاڈر کے قریب بولان ندی سے 2 لاشیں ملی ہیں۔

ذرائع کا کہنا ہے کہ سٹی قومی شاہراہ، بی بی نانی، گوکرت اور پنجرہ پل پر ٹریفک تاحال بند ہے، بی بی نانی پل ٹوٹنے کے باعث متبادل راستہ بنایا جارہا ہے۔

ذرائع کے مطابق بولان میں سیلابی ریلے سے متاثرہ گیس لائن بحال نہ ہوسکی، مستونگ، قلات، پشین اور زیارت میں گیس سپلائی دوسرے روز بھی معطل ہے۔

بلوچستان میں بارشوں کے دوران مختلف حادثات میں اب تک 5 افراد جاں بحق ہوچکے ہیں۔

بارش کے باعث تحصیل جوہی کے کاچھو کے پہاڑی علاقوں میں ندی نالوں میں طغیانی آگئی، بلوچستان کے پہاڑی علاقے گاج ندی میں سیلابی پانی کئی دیہات اپنے ساتھ لے گیا، لوگ جانیں بچانے کے لیے درختوں پر چڑھ گئے۔

تحریک انصاف کے مرکزی رہنما حلیم عادل شیخ کا کہنا ہے کہ بلوچستان کے پہاڑی سلسلے سے اچانک پانی کا ریلا گاج ندی میں آیا، گاج ندی میں طغیانی سے 50 سے زائد دیہات زیر آب ہیں۔

حلیم عادل شیخ کا مزید کہنا تھا کہ کاچھو میں سیلابی پانی سے 200 دیہات ڈوبنے کی اطلاعات ہیں۔

The post بلوچستان میں شدید بارشوں اور سیلاب نے تباہی مچا دی appeared first on ARYNews.tv | Urdu - Har Lamha Bakhabar.