سندھ ہائی کورٹ نے نجی اسکولوں کو ایک ماہ سے زائد پیشگی فیس لینے سے روک دیا

کراچی : سندھ ہائی کورٹ نےگرمیوں کی چھٹیوں کی پیشگی فیس لینے والے اسکولوں کوتوہین عدالت کی کارروائی کی وارننگ دے دی حکم دیا موسم گرماکی چھٹیوں کی ایڈوانس فیس نہ لی جائے۔

تفصیلات کے مطابق سندھ ہائی کورٹ میں اسکول فیسوں میں اضافے سے متعلق کیس کی سماعت ہوئی ، عدالت نے گرمیوں کی چھٹیوں کی پیشگی فیس لینے والے اسکولوں کوتوہین عدالت کارروائی کی وارننگ دے دی اور حکم دیا موسم گرماکی چھٹیوں کی ایڈوانس فیس نہ لی جائے۔

سندھ ہائی کورٹ نے برہمی کا اظہار کرتے ہوئے عدالتی فیصلے کے برعکس اس سال فیس کیوں لی جارہی ہے،گزشتہ سال سپریم کورٹ نےایک ماہ کی فیس ریفنڈ بھی کرائی تھی۔

عدالت نے کہا کسی اسکول نےفیس لی ہے تو دستاویزات جمع کرائیں، دستاویزات ملنے کے بعد توہین عدالت کی کارروائی کریں گے۔

دوران سماعت اسکولوں کے وکیل نے عدالت کو آگاہ کیاکہ عدالتی چار جوئی میں مصروف والدین فیسیں نہیں دے رہے، جبکہ والدین نے موقف اختیار کیا کہ اسکول انتظامیہ فیس جمع کرانےکیلئے دھمکیاں دے رہی ہے۔

شکایت پر سندھ ہائی کورٹ نے نجی اسکول کے وکیل کو ڈانٹ پلادی۔

یاد رہے 8 اپریل کو سندھ ہائی کورٹ نےنجی اسکولوں کوایک ماہ سے زائد پیشگی فیس لینے سے روک دیا تھا ، عدالت نے دو دو تین تین مہینے کی اکٹھی فیس مانگنے پر برہمی کا اظہار کرتے ہوئے کہا تھا آپ لوگ تو ٹیکس کے محکمےسے بھی آگے نکل گئے ہیں،ابھی نرمی سے کام لے رہے ہیں سختی پر مجبور نہ کریں۔

مزید پڑھیں : سندھ ہائی کورٹ نے نجی اسکولوں کو ایک ماہ سے زائد پیشگی فیس لینے سے روک دیا

جسٹس عقیل عباسی نے کہا تھا مئی میں سیشن ختم ہوجائےگا تو جون اور جولائی کی فیس کا کیا جواز ؟ سیشن ختم ہونے کے بعد تو فیس ہی غیر قانونی ہوگی ، عدالت ہم بار بار سمجھا رہے ہیں مگر آپ لوگ سمجھنے کوتیار نہیں۔

یاد رہے سندھ ہائی کورٹ نے ستمبر 2017 سے قبل کا فیس اسٹرکچر بحال کرنے کا حکم دیتے ہوئے نجی اسکولوں کو تین ماہ کی پیشگی فیس لینے سے روک دیا تھا اور کہا اگر فیس وصول کربھی لی گئی ہے تو ایسے ایڈجسٹ کیا جائے ورنہ توہین عدالت میں فرد جرم عائد کریں گے۔

عدالت نے کہا تھا پرائیویٹ اسکول بس کریں والدین کو پریشان نہ کریں، زائد فیسوں کی وصولی کسی صورت قبول نہیں جو فیس لی گئی ہے وہ واپس کرنا ہوگی۔

سندھ ہائی کورٹ نے ڈائریکٹر نجی اسکول سے فیس اسٹرکچر سے متعلق جواب بھی طلب کرلیا تھا اور نجی اسکولوں کو تنبیہ کی تھی کہ باز آجائیں ورنہ پبلک آڈٹ اور اکاؤنٹس منجمد کرنے کا حکم بھی دیا جائے گا۔

The post موسم گرما کی چھٹیوں کی ایڈوانس فیس نہ لی جائے،سندھ ہائی کورٹ کاحکم appeared first on ARYNews.tv | Urdu - Har Lamha Bakhabar.