قائمہ کمیٹی برائے خارجہ امور کا اجلاس، وزیر خارجہ کی شرکت

اسلام آباد: وزیر خارجہ شاہ محمود قریشی کا کہنا ہے کہ خارجہ امور قومی اسمبلی کی قائمہ کمیٹی کی مشاورت سے چلیں گے۔ امید ہے خطے کی تیزی سے بدلتی صورتحال پر اہم فیصلے کیے جائیں گے۔

تفصیلات کے مطابق قومی اسمبلی کی قائمہ کمیٹی برائے خارجہ امور کا اجلاس منعقد ہوا۔ اجلاس میں وزیر خارجہ شاہ محمود قریشی نے خصوصی شرکت کی۔

اجلاس میں متفقہ طور پر ملک محمد احسان اللہ ٹوانہ کو چیئرمین کمیٹی منتخب کرلیا گیا۔ وزیر خارجہ نے نو منتخب چیئرمین کو مبارک باد دی اور نیک تمناؤں کا اظہار کیا۔

اس موقع پر شاہ محمود قریشی کا کہنا تھا کہ امید ہے خطے کی تیزی سے بدلتی صورتحال پر اہم فیصلے کیے جائیں گے، پاکستان کو درپیش چیلنجز کو سامنے رکھتے ہوئے بہترین رہنمائی کی جائے گی۔

وزیر خارجہ نے کہا کہ نو منتخب چیئرمین کی سربراہی میں قائمہ کمیٹی کی مشاورت سے چلیں گے۔ خارجہ پالیسی سے متعلقہ امور پر حکومت کی بہتر رہنمائی کی جائے گی۔

خیال رہے کہ اس سے قبل برطانوی نشریاتی ادارے کو انٹرویو دیتے ہوئے وزیر خارجہ نے کہا تھا کہ پاکستان ہمیشہ سے کہتا رہا ہے کہ افغان مسئلے کا کوئی فوجی حل نہیں ہے، اس کا واحد حل مذاکرات کے ذریعے سیاسی مفاہمت ہے۔

انہوں نے کہا تھا کہ پاکستان اور امریکا کے تعلقات میں بہتری آرہی ہے، امریکی حکام نے پاکستان کی قیادت پر اعتماد کا اظہار کیا ہے۔

شاہ محمود قریشی نے مزید کہا تھا کہ پاکستان نے دہشت گردی کے خلاف خاطر خواہ کامیابیاں حاصل کیں، ہم اپنے ملک سے دہشت گردی کو جڑ سے اکھاڑنے میں کامیاب ہوئے۔

The post قائمہ کمیٹی برائے خارجہ امور کا اجلاس، وزیر خارجہ کی شرکت appeared first on ARYNews.tv | Urdu - Har Lamha Bakhabar.